பதுளை மாவட்ட புதிய ஜனநாயக முன்னணி கட்சியின் பாராளுமன்ற உறுப்பினரான சாமர சம்பத் தசநாயக்கவை எதிர்வரும் மே 05 ஆம் திகதி வரை தொடர்ந்தும் விளக்கமறியலில் வைக்க உத்தரவிட்டுள்ளது.
பதுளை நீதவான் நுஜித் டி சில்வா இன்று (21) இந்த உத்தரவைப் பிறப்பித்துள்ளார்.
இலஞ்ச ஊழல் ஆணைக்குழுவினால் தாக்கல் செய்யப்பட்ட வழக்கு தொடர்பாக அவருக்கு இவ்வாறு விளக்கமறியல் நீடிக்கப்பட்டுள்ளது.
பாடசாலை மாணவர்களுக்கு புத்தகப்பை வழங்குவதற்காக மாகாண சபை ஊடாக வங்கியிலிருந்து ரூ. 10 இலட்சம் காசோலையை பெற்று, அதனை தனது தனிப்பட்ட தேவைக்காக பயன்படுத்திய ஊழல் குற்றச்சாட்டு தொடர்பாக இலஞ்சம் மற்றும் ஊழல் விசாரணை ஆணைக்குழுவினால் தாக்கல் செய்யப்பட்ட வழக்கு இன்று எடுத்துக் கொள்ளப்பட்டபோது அவரை தொடர்ந்தும் விளக்கமறியல் வைக்க நீதவான் உத்தரவிட்டுள்ளார்.
ஊழல் தொடர்பான மூன்று தனித்தனி வழக்குகள் தொடர்பாக, பாராளுமன்ற உறுப்பினர் சாமர சம்பத் தசநாயக்க கடந்த மார்ச் 27 ஆம் திகதி கைது செய்யப்பட்டார்.
அவர் 2016 ஆம் ஆண்டு ஊவா மாகாண முதலமைச்சராக இருந்த காலத்தில் இடம்பெற்றதாக தெரிவிக்கப்படும் ஊழல் குற்றச்சாட்டுகளாகும்.
மாகாணத்தில் உள்ள முன்பள்ளி மாணவர்களுக்கு பாடசாலை பைகள் வழங்குவதற்காக மூன்று அரச வங்கிகளிடமிருந்து நிதி கோரியிருந்தார்.
இரண்டு வங்கிகள், அவருக்கு ரூ. 1 மில்லியன் மற்றும் ரூ. 2.5 மில்லியன் வழங்கியிருந்தன, பின்னர் அவை அவரது தனிப்பட்ட அறக்கட்டளை கணக்கிற்கு மாற்றப்பட்டள்ளன.
மற்றைய அரச வங்கி அவரது கோரிக்கையை நிராகரித்ததை அடுத்து, குறித்த வங்கியிலிருந்த ஊவா மாகாண சபையின் நிலையான வைப்புத்கணக்கு பணத்தை அதன் முதிர்வுக்கு முன்னர் பெற்று பழிவாங்கும் வகையில் செயற்பட்டதாகக் கூறப்படுகிறது.
இதன் மூலம் ரூ. 17.3 மில்லியனுக்கும் (ரூ. 173 இலட்சம்) அதிக நஷ்டத்தை/ வருமானத்தை ஊவா மாகாண சபை இழந்ததாக குற்றம் சாட்டப்பட்டிருந்தது.
இது தொடர்பான இரு வழக்குகளில் கொழும்பு நீதவான் நீதிமன்றத்தால் அவருக்கு பிணை வழங்கப்பட்டது. அதே நேரத்தில் ஊழல் குற்றச்சாட்டுகள் தொடர்பாக மூன்றாவது வழக்கில பதுளை நீதவான் நீதிமன்றத்தில் ஆஜர்படுத்தப்பட்ட பின்னர் அவருக்கு மீண்டும் விளக்கமறியல் விதிக்கப்பட்டது.
